Grammar Full For Naija

For Naija

If politician dem thief money

And dem catch dem,

Dem dey talk say

Na “political victimization” be dat.

 

If Boko bomb,

If militant dem maja,

Dem godfather dem

Dey talk say

Na “marginalization” cause am.

 

If leader dem no lead well

Dem dey talk say

Na “destructive elements” cause am.

 

If politician dem enter office today,

By tomorrow

Dem dey begin plan for another term,

Dem dey talk say

Dat another term na for “consolidation”.

 

If oil money disappear

Government dey talk say

Na “cabal” dem cause am.

 

If write write people

Write bad thing dem

Wey leader dem dey do

Dem dey talk say

Na “treasonable felony”.

 

If politician dem rig election win

Dem dey talk say

Na “landmark victory”.

If other politician dem rig win dem,

Dem dey talk say

Na “massively rigged election”.

 

Grammar

Na im full for Naija.